మాజీ ఎమ్మెల్యే పెద్ది సుదర్శన్ విగ్రహ గద్దె కూల్చివేత, బీఆర్‌ఎస్ శ్రేణుల ఆగ్రహం

వరంగల్ జిల్లా ఖానాపురం మండలం అశోక్ నగర్ గ్రామంలో ఇటీవల దివంగత నేత, మాజీ ఎమ్మెల్యే పెద్ది సుదర్శన్ రెడ్డి విగ్రహ ఏర్పాటు కోసం నిర్మించిన గద్దెను అనుమతి లేదంటూ గత రాత్రి అధికారులు కూల్చివేయడం స్థానికంగా కలకలం రేపింది. ప్రభుత్వ ఆదేశాల మేరకే ఈ చర్యకు పాల్పడ్డారని ఆరోపిస్తూ భారత రాష్ట్ర సమితి (బీఆర్‌ఎస్) శ్రేణులు, సుదర్శన్ రెడ్డి అభిమానులు పెద్ద ఎత్తున ఆగ్రహం వ్యక్తం చేశారు.గ్రామంలో మాజీ ఎమ్మెల్యే పెద్ది సుదర్శన్ రెడ్డి జ్ఞాపకార్థం ఆయన విగ్రహాన్ని ప్రతిష్టించేందుకు బీఆర్‌ఎస్ నాయకులు, గ్రామస్థులు ఇటీవల ఒక గద్దెను నిర్మించారు. అయితే, ఎటువంటి ముందస్తు అనుమతులు లేకుండా ప్రభుత్వ స్థలంలో ఈ నిర్మాణం చేపట్టారని గద్దెను తొలగించడం తో బీఆర్‌ఎస్ శ్రేణులు తీవ్రంగా మండిపడ్డాయి. ఈ సందర్భంగా నాయకులు మాట్లాడుతూ, ప్రజల గుండెల్లో నిలిచిన ప్రజా నాయకుడి విగ్రహ గద్దెను కూల్చివేయడం దుర్మార్గమైన చర్య అని, ఇది ముమ్మాటికీ ప్రభుత్వ కక్షసాధింపు రాజకీయాలకు నిదర్శనమని ధ్వజమెత్తారు. పోలీసులను అడ్డం పెట్టుకుని విపక్షాల ఉనికిని దెబ్బతీయాలని ప్రభుత్వం చూస్తోందని ఆరోపించారు. కాంగ్రెస్ ప్రభుత్వ నిరంకుశ వైఖరికి వ్యతిరేకంగా పెద్ద ఎత్తున నినాదాలు చేస్తూ అశోక్ నగర్ లో ప్రధాన రహదారిపై రాస్తారోకో చేపట్టారు.ఎలాంటి అవాంఛనీయ సంఘటనలు జరగకుండా పోలీసులు గ్రామంలో భద్రతను పర్యవేక్షిస్తున్నారు.